Creative Commons

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Creative Commons (CC) is 'n vaan oersprunk Amerikaons projek wat ziech inzèt veur 't bevördere vaan ope inhajd. 't Buut vaan dit projek is creatief wèrke vrijer besjikbaar stèlle es bij traditioneel autäörsrech meugelek is, zoetot die wèrke beveurbeeld gemekeleker gekopieerd en verspreid kinne weure of tot aandere dao wijer aon kinne wèrke. CC beejt versjèllende vrij licenties aon die autäörsrechhöbbende kinne gebruke um bij 't verspreie vaan informatie perbleme te veurkoume die door de allewijl autäörsrechwètgeving kinne optreie. Wikipedia maak ouch gebruuk vaan CC.

't Initiatief woort in 2001 opgeriech door o.a. Lawrence Lessig, 'ne veurstäönder veur e flexibeler systeem vaan autäörsrech. Creative Commons heet 'n internationaol netwèrk um de licenties te vertaole vaan 't Ingels nao aander taole.

Creative Commons kènmerk häör licenties door daoveur te zörge tot dees licenties begriepelek zien zoewie veur de lui (de Commons Deed) wie veur machines (de metadata) en tot de licenties aofdwingbaar zien veur de rechbaank (de juridische code: de daodwèrkeleke licentie).